പ്രവാസികളെ വീണ്ടും പെരുവഴിയിലാക്കി എയര്‍ ഇന്ത്യ എക്‌സ്പ്രസ്; നിരവധി സര്‍വീസുകള്‍ റദ്ദാക്കി

മസ്‌കത്ത്: യാത്രക്കാര്‍ക്ക് തിരിച്ചടിയായി കൂടുതല്‍ വിമാനങ്ങള്‍ എയര്‍ ഇന്ത്യ എക്‌സ്പ്രസ് റദ്ദാക്കി. അടുത്തമാസം ഏഴാ തീയ്യതി വരെയുള്ള നിരവധി സര്‍വ്വീസുകള്‍ റദ്ദാക്കിയതായാണ് പുതിയ അറിയിപ്പ്. ജൂണ്‍ ഒന്നാം തീയ്യതി വരെയുള്ള പല സര്‍വ്വീസുകളും ഇതിനോടകം റദ്ദാക്കിയ നിലയിലാണ്.

തിരുവനന്തപുരം, കോഴിക്കോട്, കണ്ണൂര്‍ വിമാനത്താവളങ്ങളിലേക്കും തിരിച്ചുമുള്ള സര്‍വ്വീസുകള്‍ ജൂണ്‍ ഏഴുവരെ റദ്ദാക്കിയിരിക്കുന്നു. ജൂണ്‍ 2, 4, 6 തീയ്യതികളില്‍ കോഴിക്കോട് നിന്നും മസ്‌കറ്റിലേക്ക് സര്‍വ്വീസ് ഉണ്ടാകില്ല. ജൂണ്‍ 3, 5, 7 തീയ്യതികളിലുള്ള മസ്‌കറ്റ് – കോഴിക്കോട് വിമാന സര്‍വ്വീസും റദ്ദാക്കി.

ജൂണ്‍ 1, 3, 5, 7 തീയ്യതികളില്‍ കണ്ണൂരില്‍ നിന്നും മസ്‌കറ്റിലേക്കും തിരിച്ചും വിമാന സര്‍വ്വീസ് ഉണ്ടാകില്ല. തിരുനന്തപുരത്ത് നിന്നും മസ്‌കറ്റിലേക്കും തിരിച്ചുമുള്ള സര്‍വ്വീസുകളേയും പുതിയ തീരുമാനം ബാധിക്കും. ജൂണ്‍ 1, 3, 5, 7 തീയ്യതികളില്‍ തിരുവനന്തപുരം- മസ്‌കറ്റ് സര്‍വ്വീസ് ഉണ്ടാകില്ലെന്നും എയര്‍ ഇന്ത്യ എക്‌സ്പ്രസ് അറിയിച്ചു.

ബലിപെരുന്നാള്‍ ആഘോഷത്തിനും കേരളത്തില്‍ അധ്യയന വര്‍ഷം ആരംഭിക്കുന്നത് കണക്കാക്കിയും യാത്ര പ്ലന്‍ ചെയ്തവര്‍ക്ക് കനത്ത തിരിച്ചടിയാകും എയര്‍ ഇന്ത്യയുടെ ഇപ്പോഴത്തെ നീക്കം. ഇതിനോടകം മസ്‌കറ്റില്‍ നിന്നും തിരിച്ചുമുള്ള സര്‍വീസുകള്‍ റദ്ദായ അവസ്ഥയിലാണ്. ചുരുക്കത്തില്‍ യാത്ര പഴയ പാടിയാകാന്‍ ഇനിയും കാത്തിരിക്കണമെന്ന് അര്‍ത്ഥം.