ചന്ദ്രഗിരി ലയണ്‍സ്‌ ക്ലബ്ബ്‌ രണ്ടാം ഘട്ട സൗജന്യ ഡയാലിസിസ്‌ മെഷീന്‍ സമര്‍പ്പണവും, അനിതാ ഷേഖിന്റെ മെഗാ മ്യൂസിക്കല്‍ ഇവന്റും ഇന്ന് വൈകുന്നേരം ടൗൺ ഹാളിൽ
കാസര്കോട്: ചന്ദ്രഗിരി ലയണ്‍സ്‌ ക്ലബ്ബിന്റെ രണ്ടാം ഘട്ട സൗജന്യ ഡയാലിസിസ്‌ മെഷീനുകളുടെ സമര്‍പ്പണവും, രണ്ട്‌ വീടുകളുടെ താക്കോല്‍ദാനവും ഇന്ന് വൈകുന്നരം 6.30 ന്‌ കാസര്കോട് മുനിസിപ്പല്‍ ടൗണ്‍ ഹാളില്‍ വെച്ച്‌ നടക്കും.
കഴിഞ്ഞ രണ്ടര വര്‍ഷമായി ചന്ദ്രഗിരി ലയണ്‍സ്‌ ക്ലബ്ബിന്റെ നേതൃത്വത്തില്‍ മാലിക്‌ ദീനാര്‍ ആശുപത്രിയുമായി സഹകരിച്ച്‌ സൗജന്യ ഡയാലിസിസ്‌ യൂണിറ്റ്‌ പ്രവര്‍ത്തിച്ചു വരികയാണ്‌. സമൂഹത്തില്‍ സാമ്പത്തികമായി ഏറ്റവും പിന്നോക്കം നില്‍ക്കുന്ന വൃക്ക രോഗികളെ കണ്ടെത്തി അവര്‍ക്ക്‌ തികച്ചും സൗജന്യമായാണ്‌ ഡയാലിസിസ്‌ ചെയ്‌തു നല്‍കുന്നത്‌. ദിനം പ്രതി വൃക്ക രോഗികള്‍ കൂടി വരുന്നതിനനുസരിച്ച്‌ കാസര്കോട് ഡയാലിസിസ്‌ ചെയ്യാന്‍ സൗകര്യമില്ല. ഇത്തരം സാഹചര്യത്തിലാണ്‌ പുതുതായി രണ്ട്‌ മെഷീനുകള്‍ കൂടി സ്ഥാപിക്കുന്നത്‌.
എന്‍.എ നെല്ലിക്കുന്ന്‌ എം.എല്‍എ ഡയാലിസിസ്‌ മെഷീന്‍ സമര്‍പ്പണ ചടങ്ങ്‌ ഉദ്‌ഘാടനം ചെയ്യും. ചടങ്ങില്‍ ചെങ്കള പഞ്ചായത്തിലും ഉദുമ പഞ്ചായത്തിലും നിര്‍മ്മിച്ചു നല്‍കുന്ന ഓരോ വീടുകളുടെ താക്കോല്‍ ദാന ംഅഡ്വ. സി.എച്ച്‌ കുഞ്ഞമ്പു എം.എല്‍.എ, എ.കെ എം.അഷ്‌റഫ്‌ എം.എല്‍.എ എന്നിവര്‍ ചേര്‍ന്ന്‌ നിര്‍വ്വഹിക്കും. പാവപ്പെട്ട രോഗികള്‍ക്കുള്ള ധന സഹായവും വിതരണം ചെയ്യും.
സമൂഹത്തില്‍ മികച്ച സേവനം നടത്തുന്ന മഹത്‌വ്യക്തികളെ ആദരിക്കുന്നതിന്റെ ഭാഗമായി കേരളത്തിലെ കരാര്‍ മേഖലയിലെ കാരണവരും സാമൂഹ്യ സാംസ്‌കാരിക രംഗത്തെ നിറസാന്നിധ്യവുമായ കെ. മൊയ്‌തീന്‍ കുട്ടി ഹാജിയെയും, ബിസിനസ്സ്‌ രംഗത്ത്‌ തിളങ്ങി നല്‍ക്കുന്നതോടൊപ്പം തന്നെ സമൂഹത്തിലെ അശരണരുടെ കണ്ണീരൊപ്പാന്‍ സദാ കര്‍മ്മ നിരതനായ വ്യക്തിത്വം അച്ചു നായന്‍മാര്‍മൂലയെയും ലയണ്‍സ്‌ എക്‌സലന്‍സ്‌ അവാര്‍ഡ്‌ നല്‍കി ആദരിക്കും.
തുടര്‍ന്ന്‌ പ്രശസ്‌ത പിന്നണി ഗായികയും, സംഗീത സംവിധായകയും, സൂഫി സംഗീതജ്ഞയുമായ അനിതാ ഷേഖിന്റെ നേതൃത്വത്തില്‍ നടക്കുന്ന റിംജിം സംഗീത സന്ധ്യയും അരങ്ങേറും.
2016ല്‍ നിലവില്‍ വന്ന ചന്ദ്രഗിരി ലയണ്‍സ്‌ ക്ലബ്ബ്‌ കഴിഞ്ഞ കാലയളവില്‍ നാല്‌ കോടിയിലധികം രൂപയുടെ സേവന, ജീവകാരുണ്യ പ്രവര്‍ത്തനങ്ങളാണ്‌ നടത്തിയിട്ടുള്ളത്‌. ഡയാലിസിസ്‌ യൂണിറ്റിന്‌ പുറമെ സൗജന്യ ആംബുലന്‍സ്‌ സര്‍വ്വീസും നലിവില്‍ സേവന രംഗത്തുണ്ട്‌. ഒരു പൈസ പോലും വാങ്ങാതെ തികച്ചും സൗജന്യമായാണ്‌ കഴിഞ്ഞ നാല്‌ വര്‍ഷമായി ആംബുലന്‍സ്‌ സര്‍വ്വീസ്‌ നടത്തിക്കൊണ്ടിരിക്കുന്നത്‌. ഈ കാലയളവില്‍ തന്നെ പതിനാറോളം വീടുകള്‍ നിര്‍മ്മിച്ചു നല്‍കുകയും ചെയ്‌തു.
രണ്ട്‌ പ്രളയക്കാലത്ത്‌ മാത്രം ആലുവയിലും പരിസര പ്രദേശങ്ങളിലും വയനാട്‌, കൂര്‍ഗ്‌ മേഖലയിലുമായി എഴുപത്തഞ്ച്‌ ലക്ഷത്തോളം രൂപയുടെ കാരുണ്യ സേവന പ്രവര്‍ത്തനങ്ങള്‍ നടത്തിയിട്ടുണ്ട്‌.
പത്ര സമ്മേളനത്തില്‍ ചന്ദ്രഗിരി ലയണ്‍സ്‌ ക്ലബ്ബ്‌ പ്രസിഡണ്ട്‌ എം.എം.നൗഷാദ്‌, സെക്രട്ടറി ഷാഫി എ.നെല്ലിക്കുന്ന്‌, ട്രഷറര്‍ എം.എ സിദ്ദീഖ്‌, വൈസ്‌ പ്രസിഡണ്ട്‌ അഷ്‌റഫ്‌ ഐവ, ഇലക്‌ടഡ്‌ പ്രസിഡണ്ട്‌ ഷരിഫ്‌ കാപ്പില്‍, ജലീല്‍ മുഹമ്മദ്‌, മഹമൂദ്‌ ഇബ്രാഹിം, ഷിഹാബ്‌ തോരവളപ്പില്‍ എന്നിവര്‍ സംബന്ധിച്ചു.
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ